注册 登录  
 加关注
   显示下一条  |  关闭
温馨提示!由于新浪微博认证机制调整,您的新浪微博帐号绑定已过期,请重新绑定!立即重新绑定新浪微博》  |  关闭

笔·三文鱼的个人主页

 
 
 

日志

 
 

[快周刊]黃金入球 林敏聰  

2006-06-29 16:32:32|  分类: 默认分类 |  标签: |举报 |字号 订阅

  下载LOFTER 我的照片书  |





林敏驄與林敏怡是八十年代香港樂壇靈魂人物,03年兩姊弟在紅館舉行《友情真經典演唱會》。

林敏驄大仔今年7歲,「林肯」只是從英文名Lincoln直譯過來,並非真名,「真名唔公開,唔想影響到小朋友。」

林敏驄、曾志偉的Gag Show是港式無厘頭文化始祖。

陳伶俐97年做《城市追擊》主持邂逅林敏驄,她說:「那時佢開Talk Show,佢經理人一見到我就話我似『女版林敏驄』,後來阿驄先開始約會我。」

四年前世界盃,林敏驄與李克勤已傳不和,「大家唔好再挑撥,我好欣賞克勤為人。」


最近全城關心的可能是世界盃 ─ 邊個同邊個不和。


娛樂版C1頭條很精彩:


阿叔直播室發爛渣、林尚義不滿李克勤扮大牌、李克勤同林敏驄積怨四年拒合照……


娛樂事業有爭議性才好。問題是,係咪Good Show先?收視幾多點先?


上星期五晚的《頂Cup好波》,林敏驄公開向全港觀眾剖白霍金事件:


「如果我的言論令到任何人唔舒服,我衷心講句唔好意思。」


翻查收視報告,《頂CUP好波》週一至五的平均收視14點,惟有週五林生深情剖白那晚,


收視攀升至20點。


情況就如黃金入球,今年世界盃的大贏家,絕非只懂陰陰笑的李克勤。


「收視好咩?但家咁多是非,我唔會再上去做(主持)咯,唔做咪返屋企睇波囉。」


廣大球迷捱眼睇波,第二朝驚遲到俾老闆鬧,無非想聽講無厘頭笑話紓壓。


這一期,球迷需要發風,香港人需要林敏驄。




如果你仍把林敏驄定位為廿年前為譚詠麟寫《霧之戀》、《愛在深秋》,為陳百強寫《深愛你》那個樂壇詞聖;又或是十年前主持《點解咁好笑》、《開心主流派》的無厘頭搞笑楷星,林敏驄鄭重告訴你,這只是他上半世人的部分覆歷。


林敏驄近年北上從商,還在北京置業,「我北京的家放了幾套Golf棍,用來招呼朋友。」林敏驄說,不懂打高爾夫球,很難跟生意上的朋友風花雪月。


林敏驄這個人是有點藝術家脾氣,熟落了又不是太難相處,太太陳伶俐像他的經理人,處處為丈夫擋駕,「我們不想談太多北京的生意,低調好。」


北上做生意要低調,回巢做主持當然要大肆宣傳。「年頭我去勁歌總選頒獎,人人都話我那Part搞笑,之後TVB請我上《百法百中》、《15/16》做嘉賓,一樣笑到碌地,於是樂小姐搵我返來做《心大心細》,又叫我留到7月幫手做埋世界盃先返北京。」




搞屎棍


林敏驄回巢為TVB做節目,主持《心大心細》、《頂級世界盃越鬥越強》及《頂Cup好波》,兩星期前,因為他拿物理學家霍金及郭秀芸的身材開玩笑,林敏驄再次被指亂得罪人,而精神過敏的觀眾又致電廣管局投訴。


林敏驄是藝術家,他有他的堅持,世界盃未打到入十六強,他已率先離場。「我唔會再上節目!」林敏驄搞搞震的形象深入民心,每次有事發生,矛頭永遠指向他。正如林敏驄的太太陳伶俐說,沒有人會信這張嬉皮笑臉,人人認定他專搞屎棍。


我跟陳伶俐說起世界盃這場風波,坐在對面的林敏驄一直懶洋洋地吸啜他的凍咖啡,在他的眼中或口中,娛樂圈由始至終都是一個遊戲人間的地方,「你玩埋細路仔把戲,我使乜降級去陪你玩喎?」


林敏驄早前與林尚義拍了一輯「巴士阿叔」的宣傳片,又與阿叔、鍾志光、伍晃榮穿上波衫為世盃造勢,明明是主持之一,近日卻淪為娛記筆下「不請自來」、「易請難送」的麻煩友。


「我都唔明,做《心大心細》都冇事,點解做世界盃咁多風雨?今次答應做主持,每次出鏡都是公司Book我入廠,無論點都好,好多謝公司俾機會我返來主持節目,至於話我『不請自來』,真係好奇怪,其實公司內部對Booking都好清楚,全部工作都是公司安排的,唔需要澄清太多。」


兩夫婦交換一個眼神,陳伶俐突然想起甚麼,又繼續說:「我老公對人好又唔俾人知,俾人誤會又唔出聲。」冷不防我又向埋頭埋腦吃炒飯的林敏驄再問:「覺得俾人擺上?」


林敏驄向我做了一個無奈表情,「可能最近冇乜新聞啦,記者要撩是非來做,我只是被利用來編故事的其中一個角色。」林敏驄把世情看得很通透,你說他無厘頭嗎?其實是另一種待人處世的智慧,「李克勤是個出色的藝人,有急才又有大將之風,希望大家唔好再挑撥我感情,無論點都影響唔到我對佢的觀感,今次合作唔到,希望下次有機會。」


林敏驄說,他從來不怕得罪人∣∣ 是冇必要得罪人。「我整蠱你,全世界笑到碌地,我梗係過癮,你就唔過癮啦,好似上星期錄《心大心細》,我同家燕姐玩得好開心,大家合作去搞氣氛,我都唔想得罪嘉賓。」




印銀紙


八十年代,林敏驄是詞壇才子,與林振強當年在填詞界被封為「雙林」。譚詠麟的經典金曲都是出於他的手筆,連李克勤參加新秀歌唱比賽那首《霧之戀》都是他寫的,論輩份,克勤應該叫他一聲「驄哥」。


「從前做幕後沒有競爭,林振強寫詞時唔會諗林敏驄寫乜,我又唔會估佢寫乜,各有各做。就算幫幾紅幾大牌的歌手寫歌,我從來唔會同佢飲茶灌水。好似那時幫盧冠廷寫詞,諗極都諗唔到寫乜題材,後來想起佢個樣成舊有毛膠擦咁,咪作首《失戀的海盜》囉。


「那時未有電腦,我填詞都是手寫的,寫到鬼畫符,每次都要抄多一次,然後返寶麗金Office影印,好似印銀紙咁,寶記包起我寫歌,寫起一堆又收一筆錢,我大大話話填了幾百首,一首歌的版稅可以收五十年。」


曾幾何時,林敏驄寫下了經典的「你說過愛在這一生裏/有過快樂與心碎 」(《深愛你》),後期又搞創作玩改歌詞,「酒杯敲你個頭/你阿媽話痛。」(《酒杯敲鋼琴》),由被公認為才情橫溢到幽默抵死,到近年略帶貶義的「發風」,已為人父的林敏驄,真真切切放下身段了。


「最近有出版社搵我出書,又有人搵我填詞,不過萬大事都睇埋世界盃先啦,我又要打理北京生意,幾時開Talk Show?我都想呀,不過未BooK到場地,唔使急慢慢啦!」




親親Daddy


陳伶俐與林敏驄的大子Lincoln今年七歲,去年考上聖保羅男女校讀小一,而由阿驄親手剪臍帶的細仔Yohji,剛滿兩歲。林敏驄說,大仔遺傳了他文靜的一面,「老師要他作一篇『我的志願』,佢話想做老師,因為冇老師就唔會有律師、醫生、消防員,思維完全唔似一個七歲小朋友,好叻仔。」




我女人


由星期一至星期日,年終無休的陳伶俐由朝忙到晚,一個家庭的大小事項都由她打點,「我戥老婆辛苦,佢一個照顧三個,又要睇功課,又要睇我開工的通告。」兩公婆有時也幾肉麻,林敏驄說娶到陳伶俐是福氣,那邊的林太又怕怕醜醜吐出一句:「我應份。」林氏伉儷的幸福都寫在臉上。


林敏驄前兩年經常北京香港兩邊飛,「我不在香港,多得老婆幫我打點,佢做得幾好。」陳伶俐聽見老公嘉許,笑得很甜:「我是他的小秘書,與其在出面請個助手幫他,不如我一手一腳做,仲唔使交帶咁多。」


看得出林敏聰是如何珍惜這個老婆,他絕少滔滔不絕談身邊的女人,這一次他講得最多,而且絕少胡鬧。


「以前跟其他人拍拖時去睇紫微斗數,相士話我97年會遇到我太太,記得佢仲話:『你第日個老婆仲好啦!』,那幾年我在等,四圍咁搵真命天子,點知真係踏正97才遇到佢。


「生了兩個小朋友,我更珍惜二人世界的時間,最享受是夜晚兩個仔睡了,我同老婆車遊車河,有時會返公司上網、睇雜誌,老婆成日話『你自己一個人對住電腦,有冇我度都冇分別!』,但如果老婆唔陪我,我一個人又冇心機留公司咁耐喎,你話我點可以冇老婆。」




黃牌警告




林敏驄說,搞藝術的人不愛受道德規範,


像十七世紀名畫家梵高(Van Gogh),


毅然把耳朵割下來。


同樣是藝術家的林敏驄,


一樣想做乜就做乜,


唯獨老婆出的黃牌,


他無力招架。


像拍照這天,


阿驄喋喋不休叫老婆,


伶俐又事無大小老公前老公後,


「老公!你放心影相啦,有我睇住架車。」


「老公!你快打番電話俾XX日報個記者,佢六點要埋版。」


「老公!你開車先啦,我拎晒衫就走得!」


香港人需要林敏驄,


林敏驄需要的,


唯獨陳伶俐一個。
  评论这张
 
阅读(1131)| 评论(0)
推荐 转载

历史上的今天

评论

<#--最新日志,群博日志--> <#--推荐日志--> <#--引用记录--> <#--博主推荐--> <#--随机阅读--> <#--首页推荐--> <#--历史上的今天--> <#--被推荐日志--> <#--上一篇,下一篇--> <#-- 热度 --> <#-- 网易新闻广告 --> <#--右边模块结构--> <#--评论模块结构--> <#--引用模块结构--> <#--博主发起的投票-->
 
 
 
 
 
 
 
 
 
 
 
 
 
 

页脚

网易公司版权所有 ©1997-2017