注册 登录  
 加关注
   显示下一条  |  关闭
温馨提示!由于新浪微博认证机制调整,您的新浪微博帐号绑定已过期,请重新绑定!立即重新绑定新浪微博》  |  关闭

笔·三文鱼的个人主页

 
 
 

日志

 
 

[3周刊]I Have A Dream 葉佩雯  

2006-08-26 12:50:14|  分类: 默认分类 |  标签: |举报 |字号 订阅

  下载LOFTER 我的照片书  |






當年與容祖兒同屬英皇小花,一個今日已是樂壇天后,要風得風;一個則繼續為自己的理想掙扎求存,各行各路。

除了介意別人說她是少奶奶之外,葉佩雯更怕人說她暴肥,有段時間她出入都變得鬼鬼祟祟,怕被人看見。

與Eric Kwok戀情穩定,又不用捱更抵夜,葉佩雯身型一度暴脹,更因此惹來懷孕疑雲,這些「輿論」亦成為葉佩雯的減肥推動力。

雖然沒有唱片公司的壓力,但葉佩雯仍非常重視新碟的成績,第一日推出便到唱片舖巡視,更乘機向fans收集意見。


美國著名黑人民權領袖馬丁路得金,曾經這樣說過:「I have a dream(我有一個夢想)……」


《少林足球》裏的周星馳亦曾經講過:「做人點可以冇夢想,咁同一條鹹魚有咩分別?」


做人應該有夢想,要圓夢便要有付出,就像夢想中六合彩獨得六千萬,都要拎五蚊出落注,連五蚊也不想付出,夢想只是一種幻想。


葉佩雯,99年簽約英皇娛樂而成為第一代小花,雖未至於要風得風,但也曾經在樂壇佔一席位。


事業泊到好碼頭,連愛情一樣搵到頭好人家,早在英皇時期已秘密與著名音樂人郭偉亮(Eric Kwok)撻着,而且維繫至今。


愛情生活叫人羨慕,但表面風光的事業卻叫葉佩雯吃不消。在樂壇兩年光景,扮小花、跳勁舞雖然受歡迎,卻同時發現跟自己的音樂夢想愈走愈遠,終於有日發覺頂唔順,毅然與唱片公司解約,退出樂壇,只要齋食鹹魚白菜也好好味的愛情。


當時不少報道都指葉佩雯有了個大靠山,可以「un un腳」做郭家少奶奶,但原來葉佩雯一直都沒有放棄過自己的夢,闊別樂壇五年,肥過瘦過、又試過變身做購物狂,但夢還是一樣,夢想自己鍾情的樂與怒可以在香港樂壇佔一席位,靜極思動後,決定再戰樂壇,目的就是要話俾人知,葉佩雯不是一個少奶奶!就算係,都要係一個勁度十足的少奶奶!


失去了自我


97年,葉佩雯被日本樂壇教父小室哲哉睇中,收為香港第一個入室弟子,在日本接受唱歌跳舞訓練,雖然為她打下一個良好基礎,但卻同時令葉佩雯的夢愈走愈遠,葉佩雯不再葉佩雯。



「英皇時期都唔可以話係好唔開心,只不過唔係我想行條路。當時一個十零歲女仔講,可以去日本學唱歌、學跳舞,呢個機會唔係個個女仔都有。其實一直以來我都唔鍾意跳舞,不過由唔識跳到家叫做跳得幾好,都算係咁。細細個我已經鍾意樂與怒,朝朝起身都要聽,所以一直都希望可以有屬於自己樂與怒,但當時我始終係一個新人,唔係話你想點就點,公司有好多事要兼顧,公司都要賺錢。


「當時我都成日同自己講,試啦,唔試過又點知得唔得,亦因為咁令我更加希望唱樂與怒。雖然到英皇時代後期,公司都有俾機會我去嘗試rock下,不過始終唔係我想要,最後真係頂唔順,唔想再繼續咁樣,終於決定退出。由我入娛樂圈開始,我從來冇期望過唱歌方面會有咩發展,我只係覺得我仲細,有機會點解唔試,就算真係衰,我仲可以去做OL、做sales,所以一直以來我都冇俾過壓力自己。


「只不過我係一個好直人,脾氣又唔算好,有咩唔滿意我一定會去爭取,又試過入高層房拍,唔識我就會覺得我脾氣好臭、難相處,不過一直以來我都冇介意過人點睇自己,我只係想做番我自己,做一個真正葉佩雯。其實解約之後,一直都有其他公司搵我,一直以來我都係等緊一間可以容許我做自己喜歡音樂唱片公司,最後終於俾我等到家唱片公司,佢真係好用心去幫我做唱片,又冇俾壓力我,我家先至可以真正去享受唱歌、音樂。」


戀愛大過天


多年來傳媒提到葉佩雯,焦點絕大部分都是與Eric Kwok的戀情,就連當時葉佩雯與唱片公司解約,都有傳因為她泊到個好碼頭,不用再在樂壇打滾,安心在家做郭家少奶奶,但原來葉佩雯對「少奶奶」這三個字非常不滿意,而且覺得噁心。



「當時好多人都以為我冇做,其實我仍然有拍戲,只不過冇乜人留意。我知道當時好多報道話我,一時又話我有個好碼頭唔使做,一時又話我有BB唔使做。首先我要講係我財政一向都獨立,我自己有錢唔使靠佢養,二來係你估佢(指Eric)真係有幾十萬未開頭?或者佢細個時可以咁講,但佢家出做,所有都係佢自己一手一腳賺番。


「成日都話我過少奶奶生活,我真係覺得好噁心,我家先至得26歲,我唔想咁快做少奶奶。其實04年佢俾人影到同第二個女仔一齊,我覺得唔係乜大事,我又唔係第一次拍拖,我反而覺得咁樣先至可以維持到一段戀情。呢件事之後,我感情反而好,一直以來我都唔信有一件事係十全十美,尤其係感情,要有齊甜酸苦辣先至叫做愛情,如果有一對情侶可以一直都唔會有事發生,你諗有幾恐怖,亦說明呢段戀情經唔起風浪,萬一真係有事發生,就一定會分手收場。所以當時佢雖然曾經受過外間引誘,但未嘗唔係一件好事,至少我之後相處反而好。


「其實自從同Eric公開之後,我覺得輕鬆,其實當時我都明白公司點解會擔心戀情公開會有影響,記得當時同佢公開之後,我起碼唔見一半fans,不過我冇介意過亦都預,我覺得如果佢因為我拍拖而離棄我,我都冇辦法。我係一個藝人,但亦係一個普通人,我都需要愛,其實家都幾好,至少我同佢出街唔使遮遮掩掩,又唔使驚俾狗仔隊跟。」


結婚又如何


根據英皇不成文的「小花條例」,葉佩雯同樣在單親家庭成長,但與其他小花不同,葉佩雯父母不是離異收場,而是父親在她兩歲時因交通意外而身亡。雖然葉佩雯沒有經歷過父母感情生變而離異的情形,不過葉佩雯坦言希望有自己的家、有自己的孩子,但卻沒有想過結婚這回事。




「唔知點解,由細到大都幾抗拒結婚,兩個人一齊最重要係開心,我成日都會諗,係咪搵個證婚人,張紙上面簽個名,兩個就會生活得開心?但我又真係唔覺,身邊有朋友試過離婚,但又有好多年紀差唔多朋友,個個都話想結婚,又話女人一生人點都要結一次婚,點解呢?我真係唔覺得囉!可能我知我脾氣真係唔好,如果我真係結婚的話,我諗我都離過好多次婚……哈,所以我同佢(Eric)都有共識,應該會有一段長時間我唔會有結婚衝動。


「不過有時我又會諗,婚我唔一定會結,不過我又想有自己小朋友,咁小朋友張出世紙點算?(記者告訴她有人認頭就得),乜唔使show結婚證書咩?(唔使,就算唔填都得,不過會變私生子)咁又唔得,不過只要唔使show結婚證書已經好好!就算有一日結婚,我諗我都唔會太鋪張,結婚始終係兩個人事,咁同屋企最close人食餐飯咪夠囉!


「我試過人結婚擺酒請飲,去一次驚一次,真係好怕擺酒,覺得好麻煩,剩係事前準備功夫已經夠你煩幾個月,最『娘』係周圍同人敬酒,諗起都怕怕!」


記者本想建議葉佩雯不如試搞一個樂與怒wedding party,個個賓客都rock住飲,應該會幾得意。不過想深一層,一個唔戴金只戴銀,一身黑皮褸兼成身窩釘新娘,咪變《怪誕屍新娘》?


我寸不起


說葉佩雯寸,的確不過分,夠膽入老細房拍,為自己爭取,已經叫發了這個夢三十多年的我佩服得五體投地。


說葉佩雯真,亦非常貼切,入到band房,葉佩雯雖然正正經經的拍照,坐定定做訪問,但眼神卻不時瞄到band房外放過百隻band sound的CD櫃。訪問完結後,葉佩雯即時飛身上櫃前搜掠,更不時嘩嘩聲:「嘩,呢隻好難搵……」、「咦,呢隻絕版都有……」、「正……阿邊個邊個呀……!」(Sorry,我真係唔知葉佩雯說的名字,究竟是英文、法文還是意大利文)。


相比之下,我係唔夠寸,亦唔夠真,因為我唔敢拍老細,就連訪問時我曾經諗緊lunch食乜,但我眼神仍然好空洞咁停留葉佩雯身上扮專業。


我諗我都係唔適合聽樂與怒,所以我決定都係聽番K歌,襯我!
  评论这张
 
阅读(268)| 评论(0)
推荐 转载

历史上的今天

评论

<#--最新日志,群博日志--> <#--推荐日志--> <#--引用记录--> <#--博主推荐--> <#--随机阅读--> <#--首页推荐--> <#--历史上的今天--> <#--被推荐日志--> <#--上一篇,下一篇--> <#-- 热度 --> <#-- 网易新闻广告 --> <#--右边模块结构--> <#--评论模块结构--> <#--引用模块结构--> <#--博主发起的投票-->
 
 
 
 
 
 
 
 
 
 
 
 
 
 

页脚

网易公司版权所有 ©1997-2017